كشفت الإعلامية المصرية أسما شريف منير أسباب حذف جميع منشوراتها السابقة على حسابها الرسمي في تطبيق "إنستغرام"، حيث يتابعها اكثر من 2.6 مليون شخص.
وشاركت صورة جديدة على طريقة الـ"سيلفي" أمام مرآة السائق في السيارة، موضحة أنها قررت نشر الصور الجديدة من دون أي تعديلات أو تحسينات، لأنها أصبحت محبةً لشكلها، وتريد تشجيع الجميع على فعل الأمر عينه، وعدّدت الأسباب الأخرى.
وقالت: "شلتي كل صورك ليه عشان عايزه اشارك معاكم حاجة تفرق، تفرق مع شخص واحد بس!".
وأضافت: "طب وهو ايه يعني اللي هيفرق في الصور دي؟ اول حاجة عايزه اوصلها من الصور دي، انها من غير اي اديت او فلتر، و دي حاجة انا في صراع دايم فيها، عشان بقيت بحب شكلي بفلتر اكتر وده شيء محزن، فا محتاجة احس اني حرة من الفلاتر والاديت عشان اشجع بنات تكون حسه احسن".
وتابعت: "تاني حاجة في صور من شغلي ومشروعي اللي تعبانة فيه جداً و محتاجة اشاركوا معاكم عشان اشجع الناس انها تاخد خطوه في انها تبدأ من الصفر عادي مهمي كانت مكنتها الاجتماعية".
وأضافت: "تالت حاجة مشروعي الاصغر هو الفخار، و ه انا عملته عشان اشجع المنتجات اليدويه الطبيعيه الصحية و عشان انا دلوقتي بختار اغلب اختيارتي في الحياة اي حاجة راجعة للطبيعة".
وأردفت: "رابع حاجة، لما تخنت كنت مكسوفة بس تقبلت جسمي وحبيته بس ده مش معناه اني مش عايزه اوصل لأفضل شكل صحي لجسمي، فا شغاله عليه و عندي خطة للتغير، بس لحد ما اوصل للنتيجة الصح انا حبه نفسي وانوثتي و شايفة نفسي تمام اوي".
وواصلت: "خامس حاجة، اني بحلم احلام ناويه بكل قوتي احققها فا بقيت بحط نفسي في الاماكن اللي شبه حلمي، بجذب الناس اللي بتفيدني، بحلم احلام كبيرة بس مش و انا قاعده علي الكنبة، و انا بسعي في شغلي و مصدقة اني هوصل ل اكتر ما بتمني وده بقولوا عشان اشجعكم انكم تتحركوا و متأجلوش اللي نفسكم فيه مهمي كانت الحاجة اللي موقفاكم".
وأشارت إلى السبب الأخير: "سادس حاجة، التأمل في خلق الله، غير حياتي و خلاني اكون شخص اهدي و ممتن اكتر، و حساس اكتر".
وختمت: "انا حقيقي نفسي افيدكم و اساعد اللي بيتبعوني يكونوا احسن ب اي طريقة ممكنه، و انا بحضر حاجات جديدة اتمني انها تكون مصدر الهام ليكم، وحشتوني اوي".
إرسال تعليق